Mandarinat e Konispolit, simbol i suksesit agrar dhe turistik

Përgatitur nga miremengjes.net

Në jugun më të thellë të Shqipërisë, aty ku toka ngjitet drejt kufirit me Greqinë, ndodhet Konispoli një vend i vogël me një emër të madh në sektorin e bujqësisë shqiptare. Në dekadën e fundit, ky qytet është shndërruar në qendrën më të rëndësishme të kultivimit të mandarinave në vend.

Foto nga Mileja

Suksesi i mandarinave “Made in Albania”

Fermerët e zonës, të njohur për punën dhe aftësinë e tyre për të ndërmarrë iniciativa, kanë krijuar plantacionin më të madh të mandarinave në Shqipëri. Me mbi 900 hektarë tokë të mbjellë dhe një prodhim që ka kaluar 30,000 tonë në vit, Konispoli tashmë është një emër i njohur edhe në tregjet ndërkombëtare.

Në dhjetor të vitit 2020, u eksportuan mbi 7,200 tonë mandarina në pesë vende të ndryshme, përfshirë Kosovën, Maqedoninë e Veriut, Serbinë, Ukrainën dhe Çekinë. Kjo përfaqësonte një rritje prej 12% krahasuar me vitin paraprak. Në ditët kulmore, nga Konispoli eksportoheshin deri në 450 tonë mandarina në ditë.

Foto ilustruese

Klima mesdhetare dhe rikthimi i agrumeve

Faktor kyç në suksesin e këtyre prodhimeve është klima mesdhetare, që e bën këtë zonë ideale për kultivimin e agrumeve. Nga vetëm 100 hektarë të mbjella në vitin 2005, Shqipëria arriti në afro 1,000 hektarë plantacione mandarine deri në vitin 2019.

Mandarina që tërheq turistë

Por mandarina nuk është vetëm një produkt eksporti. Ajo ka nisur të tërheqë edhe turistë që duan të përjetojnë peizazhet e rralla mesdhetare të Konispolit. Me vila guri, ullinj, fiq dhe bajame që krijojnë një pamje karakteristike, qyteti ofron përvojë unike për ata që kërkojnë qetësinë dhe autenticitetin.

Pamje nga fusha me mandarina

Pamja e kodrave me forma të përkryera, Mali i Ajtojt, ngushtica e Korfuzit dhe plantacionet e pafundme e bëjnë këtë zonë të përshtatshme për investime të ardhshme në turizëm të qëndrueshëm.

Ecje drejt historisë dhe natyrës

Konispoli ofron edhe shtigje për ecje të jashtëzakonshme, si ai që nis nga Xarra për në Kepin e Stillos, ku mund të shihet deti Jon dhe ishulli i Korfuzit nga një perspektivë ndryshe. Kreshmoi dhe Marena janë dy shpella të lashta të mbushura me histori, që presin të zbulohen nga vizitorët.

Pamje nga Kepi i Stillos ( Tongo ?

Shija e kuzhinës çame

Gastronomia vendase është një tjetër arsye për të vizituar Konispolin. Nga pjatat e mishit si “Paca Prere”, te byrekët me kungull dhe lule kungulli të mbushura, kuzhina çame mbështetet te përbërës natyralë si mishi i qengjit, barishtet dhe vaji i ullirit.