Njëqind herë sa keq!... Opinion nga Pajtim Çaushi

Edhe një mendje mjerane militanti, sado e kriposur me idhulltari partiake të jetë, kur ndodhet ballë dukjesh tragjikomike, stepet dhe thotë:

- Sa keq...

Edhe më i palexuari kur dëgjon thirrmat "kushtetuese" të Presidentit dhe profecitë "shpëtimtare" të Kryeministrit kujton të dëgjuarat e kafeneve për proverbialët karagjozë Don Kishoti e Sanço Panço dhe psherëtin:

Pajtim Çaushi

- Sa turp!...

Jam i bindur se sikur të qenë edhe gratë më shemra për xhelozi paresh e meshkujsh, nuk do të flisnin për shoshoqen me atë mllef e cinizëm si i drejtohen "kokat" e shqipes President dhe Kryeministër njëri tjetrit në vitin 2020. Para kësaj karnavaleje dyshe e shfaqje groteske molieriane vocrraku skamnor i Veriut dhe vogēlushi lypsar i Jugut do psherëtinin duke kujtuar vargjet e Fishtës të shkruara në vitin 1920: "Ta dëgjojë gjithë populli mbarë, dy tri fjalë me thanun deshta: bashkë do bëhen dy shqiptarë aq sa bëhen dy thasë me pleshta..."

Dy kërthitë, me lotë në sy e brengë në shpirt, pëshpërisin për të qindën herë pasthirmë:

- SA KEQ!

Pas kësaj shohin për të gjetur ndonjë shteg që të mund t'ia mbathin diku detit a malit... "Se në vendin e shqipeve mjerimi e pjek fëmijën para se të burrnohet", shkruante Migjeni diku nga vitet '30 të shekullit XX. Sa keq!... Sa keq!... Thirrje, po kujt?... "Malet" heshtin dhe ne heshtje qeshin!...