POEZI nga vëllimi DRITËZIM IKJESH... i poetes Klejda Plangarica

Braktisja

Gjithë jetën time të desha

Të urreva më shumë se kaq...

Sot pas shumë kohësh

I fshiva përsëri pluhurat

Edhe në to kish lënë gjurmë Braktisja.

Të paprekura, jetuan më shumë se një ditë

Me shenjat e gishtërinjve të tu përsipër

që tani e humbën shenjtërinë e tyre

të ruajtur me aq fanatizëm..

U hakmora kështu për ty

me pluhurat rivalë

S'ke si ta dish c'hakmarrje ish!

Ata më kishin rrëmbyer

gishtrinjtë që patën prekur trupin tim...

---

Shpresë

Pareshtur hedh guralecë dhimbjesh

mbi një det që nuk e shoh,

Por, e di që është...

A thua do krisë ndonjeri

një guackë perle

të fshehur për mua...?

Liqeni

Ashtu i drithshëm, ashtu i thellë,

Dëshirë dhe drojë njëkohësisht...

O lot mister që mbet në sy

Në ty, E bukura emrin fsheh.

Ikjet nga ti, në kthime kthehen

Se ti në cdo zgjim timin lind diellin...!

Julkës

Je kështu, e këndshme si deti,

E trazuar si ai në erëra.

E tejdukshme si vala.

Në ecjen tënde,ke prapë dicka prej tyre

Ndoshta finesën, a ndoshta gjallërinë...

Me flokët gjysmëbiond të derdhur supeve

Pa asgjë të kaltër,

Megjithatë ndjell kaltërsi...!

---

SHËNIM:

Mendoj se Klajda është një risi në poezinë tonë bashkëkohëse. Këto shfaqen natyrshëm në rrjedhën e brendshme nëntekstor të mendimit, në përdorimin e fjalës dhe figurës, në thjeshtësinë e sinqeritetin e shprehjes poetike si dhe mënyrën estetike të strukturimit të vargjeve.

Ndërtimi ciklor i vëllimit të duket sikur është një shumësi ndjesishë të përjetuara në rrjedhën e jetës së përditshme, Por poetja nga përditshmëria përgjedh detajin, e ngre atë në art dhe e vesh me figuracion e mendim origjinal.

Redaksia e portalit MIRËMËNGJES.NET e falenderon auitoren që lejoi publikimin e poezive të veta në median tonë dhe i uron suksese kësaj krijuesje të talentua. // nga Pajtim Çaushi