Provokim ndaj shqiptarëve në Bujanoc, qeveria Shqiptare dhe e Kosovës të reagojnë

Nga Refik Hasani

Bujanoc, 6 shtator 2025

Akt i shëmtuar dhe gjuhë urrejtjeje

Dënojmë fuqishëm aktet e fundit të shfaqjes së grafiteve në qendrën e Bujanocit, ku është shkruar emri i kriminelit të luftës, të dënuar për gjenocid në Srebrenicë të Bosnjës e Hercegovinës, Ratko Mladiq.

Këto grafite, të shkruara në alfabetin cirilik, përfshijnë simbolin e kryqit dhe katër shkronjat "C", që lexohen si "S", duke i dhënë kështu mesazhit të tyre karakter të hapur provokues, kërcënues dhe nxitës të urrejtjes etnike kundër shqiptarëve të Bujanocit, Preshevës dhe Medvegjës.

Vazhdimësi e provokimeve dhe kërcënimeve

Ky nuk është rasti i parë. Vitin e kaluar në qendër të Bujanocit u thye billboard-i i Komandantit të UÇPMB-së, Ridvan Qazimi – Lleshi, ndërsa gjatë dy viteve të fundit janë shtuar dukshëm mbishkrimet me mesazhe si “Vdekje shqiptarëve”.

Grafite të tilla janë shfaqur edhe në Shtëpinë e Shëndetit në Bujanoc, në Preshevë dhe në Medvegjë, duke dëshmuar se kjo dukuri është kthyer në përditshmëri shqetësuese. Përmes tyre synohet të mbillet frikë, pasiguri dhe të dërgohet mesazhi i shpërnguljes, asimilimit dhe diskriminimit të shqiptarëve.

---

Thirrje për reagim ndërkombëtar dhe institucional

I bëjmë thirrje:

• Institucioneve më të larta të BE-së dhe mekanizmave të OKB-së, që të shtojnë prezencën, monitorimin dhe angazhimin në këtë rajon.

• Qeverisë së Shqipërisë dhe Qeverisë së Kosovës, që të reagojnë zyrtarisht duke dënuar këto akte.

• Republikës së Serbisë, që ka përgjegjësinë të dënojë dhe të ndalojë gjuhën e urrejtjes, provokimet dhe kërcënimet që i drejtohen shqiptarëve në Luginë të Preshevës.

Shfaqja e grafiteve në qendër të Bujanocit është dëshmi e qartë se, përveç pasivizimit administrativ dhe diskriminimit të përditshëm, shqiptarët e kësaj krahine përballen me një klimë të rëndë kërcënimesh dhe presioni etnik.

Lugina e Preshevës mbetet një nga rajonet më të pazhvilluara në Evropë, dhe kjo nuk lidhet vetëm me ekonominë, por edhe me statusin politik të saj të pazgjidhur.

Grafitet me emrin e Ratko Mladiqit nuk janë vetëm shkrime në mur: ato janë mesazhe urrejtjeje, kërcënimi dhe pasigurie. Është detyrë e institucioneve vendore, rajonale dhe ndërkombëtare që të reagojnë fuqishëm, për të mos lejuar përhapjen e një gjuhe që cenon paqen, bashkëjetesën dhe të drejtat e shqiptarëve në këtë rajon.